إسعافات أولية من الهلال الأحمر-بانياس

أول شي سلام لكل الشباب الطيبة



هاي المواضيع خصصناه لحتى نتعرف كلنا

عن شي من مبادئ الإسعاف الأولي

يلي هوي ضروري كتير لحياتنا و حياة حبايبنا

و سهل كتير

معلومات بسيطة بس فائدها صدقوني كبيرة

و هلئ خلونا نبلش

إذا شي مرة تخانئت خنائة كبيرة

و ضربك واحد سكينة!

شو بدك تساوي يا حزرك؟؟؟؟؟؟؟؟؟؟


بلغ الشرطة هههههههه

أول شي و الأهم إنك ما تحرك السكينة و لا تشيلها

ليش؟ لأنها بتشكل عازل أمان

وهي أثناء دخولها قطعت شرايين أو مرت من جنب شي وريد

فهي شكلت حاجز ضمن الشريان أو الوريد

منع النزف الداخلي فإذا شلتها خربت الدنيا

و يمكن أثناء خروجها تقطع شرايين جديدة


اذا فهمنا أنو ما نحركا اوكي لهون

هلئ منحاول أنو نثبتا لحتى

نوصل ع المشفى أو تيجي سيارة الإسعاف

أما بالشغل الهلالي فعنا شي بهي الحالة

لحتى نثبت السكينة اسمو (كعكة) اي لا تستغربو إسمها

هي عبارة عن قطعة قماش ثلاثية

إلها تلت زوايا متل المثلث

منلفها بطريقة معينة لحتى تطلع معنا بشكل

كعكة دائرية منتحكم بقطرها

بحسب عرض السكينة بحيث تكون محيطة فيها

كعكة ورا كعكة لحتى نثبتها منيح

بعدين منحطو بسيارة الإسعاف و منشد فيه

يا بيلحق يا ما بيلحق

هلئ حكينا عن السكينة طبعا هالحكي ع السكينة ع الخنجر... بوري حديد

أي شي

وهلئ بااااي و انشالله ما تتعرضو لهيك شي

لموضوع هلئ عن الحروق

قبل كلشي شو هو الحرق؟

هو تلف يحدث في أنسجة الجلد نتيجة التعرض الشديد للحرارة(ماء ساخن-بخار-شمس-أشعة....)

تصنف الحروق الى 3 أنواع أو درجات
رح نحكي هلق عنها ونتعرف عليها أما عن إسعافها بشكل مختصر
لأنها طويلة منخصصلها موضوع خاص

الدرجة الأولى

السبب: التعرض لأشعة الشمس لوقت قصير أو التماس المباشر مع شي ساخن
(بخار-لهب- شاي....)

العلامات: احمرار +انتفاخ+حرارة+ألم موضعي

الأسعاف: تبريد مكان الحرق بالماء البارد مدة 15 د ثم يترك لينشف بالهواء
ترطيب بالملراهم المرطبة

الدرجة التانية

السبب:التماس الطويل مع شي ساخن (حرق المكواة- التعرض الطويل لأشعة الشمس..)

العلامات:ألم شديد شي أكيد و ظهور فقاقيع يتعدى الحرق سطح الجلد

الإسعاف:تبريد بالماء البارد 15د . لالالالالالالالالالا نفقي الفقاقيع


الدرجة التالتة

السبب: التماس مع النار لفترة طويلة أو أبريق متة اندلق أو شي ضربة كهربا أو مواد كيماوية ..

العلامات:مساحة الحرق كبيرة تتعدى مساحة يد المصاب (وحدة قياس الحرق)
+ قد يصل الحرق حتى العظم +لون الجلد أسود+ ألم شديد +شفوفية الجلد

الإسعاف: عدم لمس الحرق و لحقو لأقرب مشفى


الإسعاف بشكل أوسع شوي بالموضوع (إسعاف الحروق)


تبئو سالمين يا رب

إسعاف الحروق




- عند استمرار النار بالاشتعال في ملابس المصاب نحاول منع المصاب من الركض أو التدحرج على الارض بل نلفه ببطانية (خالية اكيد من النايلون )

-إذا كان السبب مواد كيماوية مخبرية أو ماء أو شاي ساخن ننزع الثياب فوق منطقة الحرق مباشرة و لكن انتبه إذا كانت الثياب عالقة يمنع نزعها لآنها تعتبر حاجزا واقيا ضد الجراثيم

- حريق مشتقات البترول (البنزين)يمنع إطفاؤه بالماء لانه من الاشتعال

-حريق المواد الكيماو ية لا يطفأ إلا بالماء

- يمنع استعمال الثلج اثناء التبريد لآن ملامسته لسطح الجلد مباشرة يسبب حرقا أيضا
أو استعمال معجون الاسنان لآنه يحتوي على مواد كيماوية تسبب تخريشا بالجلد

-يمنع استعمال الماء الاوكسجيني على الحرق منعا باتا

-الحروق هي الحالة الوحيدة التي يمكن إعطاء المصاب سوائل لتعويض ما فقده جراء الحرق

دمتم سالمين

مرحبا كيفكم


انشاالله تكونو بخير ع طول

كلامنا هلئ عن الاختناق بجسم غريب


عنا حالتين:

1- ضربات بين الرفشين (الكتفين)

2- مناورة هايمليش يلي رح نحكي عنها هلئ


مـــــنـــــــــاورة هــــايــــمــــلــــيـــش

1- مناورة هايميلش لشخص واقف و متلو جالس

شو منساوي

نحرر المجاري الهوائية مما يعيقها ربطة عنق كنزة ضيقة وشكلو

منوقف ورا المصاب و ندخل إيدنا من تحت الابط و نقيس

3 أصابع بدون الابهام و الصغرى فوق السرة

نضع اليد التانية على شكل بوكس و بتكون قاعدة البوكس على بطن المصاب

يعني الابهام و السبابة على بطن المصاب

اليد المستخدمة بالقياس منحطها فوق البوكس

بعدين نضغط مع برم اليد الى الاعلى أربع مرات.


2- مناورة هايمليش لشخص نايم مو نايم غافي يعني ممدد

نجلس دوما قرب المصاب على ركبتينا و نحرر المجاري الهوائية مع توجيه الرأس لجنب

مشان الاستفراغ ثم نقيس متل قبل 3 أصابع فوق السرة و نمد راحة كف اليد الاخرى على بطن المصاب و اليد المستخدمة بالقياس نضعها فوق اليد

الاخرى و نشبك الاصابع مع بعضها بحيث يصبح الضغط براحة أو قاعدة الكف فقط .الى الاسفل و الاعلى 4 مرات



انشاالله تكونو تصورتو الحكي

مرحبا

بدنا نحكي

عن شي كتير مهم بالإسعاف عنا

نحن لما نسعف شخص مصاب بأي شي متل جروح بليغة - كسور -الانفعالات النفسية


منحاول ما يصير معو حالة صدمية!

بس شو هي الحالة الصدمية!

عند وجود أي عطل أو خلل بشي جهاز من أجهزة الجسم رح يعمل خلل بالجهاز الدوراني ( الدورة الدموية) و هاي كمان بتعمل لنقص

بالاوكسجين على مستوى خلايا الجسم و خص نص خلايا الدماغ هادا الشي هوي يلي بتسمى "الحالة الصدمية"

يعني شو


الحالة الصدمية هي عدم وصول الدم المحمل بالاوكسجين الى الدماغ

أسبابها

في الاصابات الطفيفية: يعوض الجسم تلقائيا فيتسرع القلب وتزداد سرعة التنفس

في الاصابات الخطيرة: فبسبب فقد كميات كبيرة من الدم لا تكفي حالة التعويض فتحدث الحالة الصدمية

تترافق الحالة الصدمية مع الإصابات التالية:

نزيف حاد -( جروح خطيرة - جروح بليغة) طبعا في فرق بينهم

كسور - جروح بسيطة و رضوض عديدة - الانفعالات النفسية ( خوف فرح حزن )


علامات الحالة


1- شحوب اللون + برودة الأطراف و ازرقاق

2- تعرق بارد + رجفان

3-ضعف وانحلال في القوى

4- عطش شديد ( نتيجة سرعة دوران الدم)

5-اضطرابات نفسية + نبض متقطع و غير منتظم

6- خوف + دوخة + إغماء

هلق إسعافها

عنا حالتين

المصاب واعي

1-نمدد المصاب على الارض مع رفع قدميه زاوية( 45 د ) <هلق واحد بقيسها> أكيد لاء بس تقريبا

2- تغطية المصاب و محاولة الحفاظ على وعيه و تطمينه و تدفئته

3-يمنع منعا باتا إعطاء المصاب أية سوائل حتى الماء اوكي

هلق المصاب غير واعي:

نضع المصاب بوضعية الامان الجانبي مع رفع قدميه زاوية قديه 45 صح

و تغطية المصاب للحفاظ على حرارتو مع المراقبة


الحالة الصدمية خطيرة جدا و تؤدي الى الموت

بصراحة فكرة حلوة ومفيدة بتشكرك كتير على طرحها
انا لاهمية هالدورة عملتها عند الهلال الاحمر وكتير كانت ممتعة استفدتمنها كتير والشباب المسعفين كانوا كتير متعاونين ومعطائين بوجهلون شكر كتير كبير

و لو هادا واجبي و مهمتي
و باب التطوع مفتوح لمن يرغب في أن يصبح عضو في أسرة الهلال الأحمر في بانياس
و رقم هاتفي موجود لأي استفسار 0999727786
و اكيد متل ما ذكرتي دورات الاسعاف الاولي كتير مفيدة

شكرا جزيلاً لك على الفائدة التي تقدمها ...تلك معلومات هامة ماكنا لنعرفها لولاك .