على شو

بانياسي اصلي كتب:عفوا يا جماعة
بدي وضح شغلة بتمنى تفهموها منيح
طبعا هيي شرح لما قالته شمس و اياد
بالقديم كانت فنون النحت او الرسم او الفخار او اي نوع من انواع الفن اللي بسموه فن تشكيلي يعتمد عالتصوير
بمعنى انو الفنان بكون من اروع الفنانين واكثرهن ابداعا
كل ما كانت لوحاتو - خلينا نحكي عالرسم بحكم انو الموضوع عن لوحة - قادرة تصور الواقع بطريقة قريبة من الواقع
بالنسبة للموناليزا مثلا
طبعا بتعرفو اسباب الضجة اللي اخدتها بس بالاضافة لهاد الشي كان الفنان اللي راسمها عم يهتم بتصوير الشخصية بشكل دقيق وعالي
فاذا ما كان ضايف ليوناردو على الموناليزا اي تحسينات بحكم انو فنان ورسمها بشكل يطابق شكل صاحبة اللوحة قدر استطاعتو
فوقت رح نشوف صاحبة اللوحة رح نعرفها من خلال الرسمة فصارت بالنسبة الها متل الهوية
بتمنى تكون هالفكرة وصلت واللي باختصار تعني انو الفنان قديما كان يصور ما بس يرسم
بالوقت الحالي - بتوقع هلاء يمكن يزول استغرابكن عن هاللوحة لما تعرفو هالشي اللي بدي قولو -
بالوقت الحالي بوجود الات التصوير صار في مذاهب جديدة بالفن وبمجال الرسم تحديدا
السبب انو الفنان صار يقول لحالو انا ليش لحتى صور بما يطابق الواقع
بريح حالي وبجيب كاميرا وباخدلها صورة
فبالنسبة الهن صار هاد ما فن
فتغيرت الفكرة عند الفنانين بهاد العصر الى انو كل واحد بعبر بطريقتو الخاصة عن الواقع ولكن من دون ما يصورو تصوير فوتوغرافي
انما بمجرد اشكال هوي بيختارها
بالنسبة لهادي اللوحة انا رح احكي اللي شفتو انا فيها يعني ما بعرف اذا هالشي هيك بيقصدو صاحبها انما قراتي الشخصية
فقد يكون عم يعبر الرسام عن تناقضات الواقع اللي عايش فيه ومشاكلو
ولعلمكن بعلوم الفنون كل لون ودرجاتو الو مدلولات خاصة فيه
وفيه مؤلفات عظام بهاد الخصوص
فبعبر الفنان عن طريق الألوان عن فكرتو
مثال اذا كان في الوان متالفة فهوي بيقصد شي عاطفي متل الاخضر والبني فهني متالفين لانهن بالطبيعة مثلا هني لونين للشجرة فلهيك ما حدا بشفوهن بشعين مع بعض اضافة الى انو البني بينتج من مزج الاخضر مع الربتقالي على ما اعتقد
فهوي ناتج منو فمارح يتناقض معو
اما مثلا اذا وضع الاحمر وهوي للحب مع الاسود وهوي للحزن
فاكيد عم يعبر عن شي هوي عمل في نفسو ضيق او ما شابه
وطبعا فهمكن كفاية
ومن الطبيعي انو الانسان العادي يشوف هاللوحة بطرقة بعيدة عن رؤيا الفنان طالما انو ما وصلو شرحها
اما لو انو انشرحت امامو فاذا ما اقتنع فيها الا انو اكيد رح تتغير وجهة نظرو ولو بشي طفيف
كلمة اخيرة
اذا دققنا النظر بهاللوحة ممكن نشوف شي بيشبه حجر نوع من انواع الرخام
واكيد كلكن بتعرفو الرخام وشايفين احجار رخام بتاخد العقل ببعض الاحيان
ونفس الكلام ينطبق عالغرانيت والاحجار الكريمة وما الى ذلك
وبعتذر شديد الاعتذار عالاطالة
الا انو حبيت اعطيكن بعض المعلومات من قليل ما عندي ما اكتر
وشكرا للجميع
وخصوصا لشمس واياد