من طرف 
ارحل بقى
شعر: أحمد فؤاد نجم
بحبك يا ريّس وحبك يا ريس
معكنن عليّـــــه
مقطعلى قلبى
مطلع عنيّــــة
سيبونى فى حالى
وبيّا اللى بيـّــــــة
دا كل اللى ليّة
محرم عليـّــــة
عشان حاجة واحدة.. عشــــــانك يا ريّس
*********
بحبــــــــــك يا ريّس
دى كلمة قالوها..
زمان من ســـــــــنينْ
وكل اللى قالها ..
مطـيـن بطـيـنْ
يا سارق فلوسنا..
يا كاتم نفوسنا
يا واكل عرقنا ..
برجلك دايسنا
ولســـــه بحبك..
واحب اللى حبك
وباحلف هاحبك..
واحب اللى جابك.. فى يوم أغبر علينا ريّس
******
مبارك يا ريس ..
عليــــك البــــلدْ
لابنـــك وابنــــه..
وولد الولدْ
سوزانك سوزانّا
جمالك جمالنا
علائك علائنا ..وبكرة وبعده وطول الامدْ
*********
غَبــــاءكْ يا ريّس
ملوش حل خالصْ
وسايق ف الهبل
وكلامك هجايصْ
ولولاك يا ريّس
مكنشى دا حالي
وحال كل مصري.. مدروخ ولايـص
***********
قالوا العيشة حرّة
وهي العيشة مرّة
ومش مـــرّ عادي
دا صبركّ يا ريس
ممرمر بلادى
وأسعار بترفع
مأتنزلش مرة
وباين علينا هنطلع لبَرّة
***********
رغيفك يا ريس
بيصغر ما يكبرْ
وسعره يا ريس
بيرفع ماينزل
سألنا دا ماله
قالولنا الحديدْ
وايه العلاقة
بسعره الجديد
تكونش يا ريس
لغيت الدقيق
وبتطحن بداله
برادة حديد؟
مهو انت اللى عارف
وسامع وشايف
جمالك قشــطنا
وعز اللى خاننا
وولـــع بلدنا ..بِرفع الحديد
**********
ماتصحى ياريّس
وصَحّي البلدْ
هنبقى يا ريس
كمالة عددْ
ف وسط العوالم ْ
وشعبى اللى هايمْ
وكبته اللى دايمْ
وقرشه اللى عايمْ
هنبقى يا ريس
كمالة عدد
واقولك واعيدلك
لانى بحبك
نصيحة فصيحة
نصيحة مريحة
لبلدى وبلدك ...ماترحلْ يا ريس
ليه دايما متيّس
ودايما مهيّس
مترحل بقى
وخد لي ف وشّكْ
جمالك .. مشْ بَغشّكْ
علائك.. سوزانك شريفك
سرورك نظيفك ..
كمالك وعزك ..
خدهم وانصرفوا
أشـــتاتآ أشتوت
خدهم وانصرفوا
لحْسَن حَنْموتْ
ارحل بقى
ارحل بقى
مترحل ..بقى
